I Hun I hmang Ṭha em?

Ṭhalaite hian min ngaithla ṭheuh dâwn se la, an hnêna ka sawi duh chu nangmah a thil awm zawng zawng khâ a ṭha thei ang berin hmang rawh tih hi ka chah ngei ang.

Hun hi a pawimawh khawp mai, aṭhenin hun âwl hman ṭhat an tia a, a duhtui zualin hun âwl ni lovin hun hman ṭhat tih zâwk tur an ti a. A enga pawh chu lo nise, kan hun hman tawh ṭheuh kha chhui kir ila inchhirna tur kan nei em? Ko kir leh thei ta ila tiin kan ngaihtuah vawng vawng ngai em?

Khai aw... Kan dam chhûng nun chuanna lawng hi a te si a, kan mamawh tâwk aitam hi kan dah lût ṭhin a, a kal hê bûr bûr a, a châng leh a pil lek lek mai chu a nih hi. Dam chhûng nun hi a tawiin a chiang lo si a, a ṭha thei ang bera hman pawh hian kum tam a nih loh vei nen hian, kan la hmang ṭha peih lo/ duh lo ve khanglâng chu a ni si a. Sual man chu thihna a ni tih te hi chhiar châmchî mah ila, kan zâwm lêm hlei lova, thu ṭha chu hria a zâwmtu nih hi a him a sin. Ṭiauvut chunga insatu ang lek hi kan va tam ṭhin êm.

Ṭhalai reng reng thi mai thei tura in ngai tumah an awm ngai lo, tumah kum khat dang dam leh thei lo tur khawpa upa a in ngai an awm hek lo. Mah se hei hi han chhiar teh ‘Thihna hi chu dan chi a ni lo; atân kawngkhar sang tam tak a inhawng si a,’ Tar/upa te hian thihna chu an pan a, ṭhalaite erawh thihna hian min pan thung a.  Ni e, engtikah nge hekhawvêl nun hi i chhiar zawh dâwn? I dam chhûng ni te chu Pathian lawmtlâkin i chhiar rêng em? I damchhûng a hun rei lote i neihah khân midang tân thilṭha hriatreng tlâk enge i hnutchhiah ve lê? Chhûn hmanṭhatin zân mut a ti tui angin, hun hmanṭhatin thihna thlamuantlâk a thlen a sin. ‘Thihna khuma inlamlêtna hian ngaiawh lehna a thlen khât hle tih te, Thihna khuma Piantharna chuan vân kawngkhâr a kik hawng mawh khawp ang’ tih ziak te hi i lo hmu tawh ngai em? I nakin nun zawng zawng chu Tûn hmanṭhatah khân a in nghat a sin. I thlarau lam thlenga innghahna chu I hun hman dânah khân a innghat a, engtinnge i hman zêl dâwn?

Krismas leh kumthar vuakvêtah ṭhalaite tân thlêmna a nasa êm êm. Mitam takin he hun hi mahni hlimhlawp bâwl nân an hmang ṭhîn. Hlim hi a duh a duh hrim hrim ni ila chu thil har a ni lo a, amaherawh chu, midang te ai a hlim zâwk nih kan duh tlat ṭhîn a, chu chu thil harsâ a ni a, kan zahawmna hlauhṭhak khawpin kan che a, midang tâna hnawksak khawpin hlim hlawp kan bâwl a, kan in chhîr leh si. Upat lamah inchhir in hun kan hmanga, kum upat lamah Pathian kan bêl a, kan ṭhatlai huna b>ê ṭha duh mang si lo hian. Pathian pawh hian kan ṭhat lai nun ngei hi a duhve. Keini a mihring siam mai pawh hian pangpâr vuai tawh ai chuan a thar lâm chu kan duh zâwk êm êm lo vem ni? I ṭhat lai i hun hlu ngei kha Pathianin a duh a sin, I pe phal ve dawn em le? Hei erawh min chhâng teh I hun i hmangṭha em? Pu Rokunga’n a lo tih kh a maw..

Mizo Thu leh Hla a sulsutute

Rev. Dr. Zairema

(1917-2008)

Zofaten Rev. Zairema hming kan lam ruala kan rilrua lo lang  hmasa chu Mizo zinga B. Sc. pass hmasa ber leh B.D hmasa ber a nihna hi a ni awm e. Zairema pa hi Zirtirtu Diliana Khawlhring a ni a, a nu chu Aibuani, Lêng lal Saihnuna û a ni. March 4.1917-ah Hmunhmeṭlha khuaah a piang a. Unau 3 zinga a upa ber a ni. A pa hi Champhai (Chawnchhim) a Primary Zirtirtu hna thawk a ni a, Cherra Theological School-a Pathian thu zir tura thlan fel diam tawh, kal tura a inbuatsaih laiin kum 1922 May 6 khân thingah a tla a, a hnu ni hnihah a thihphah ta hlauh mai a, Pi Aibuani hian a fate chu a ṭulpui ta a ni.

Govt. Boys’ M.E School, Aizawl (Sikulpui) aṭangin kum 1931 khân Class VI First Division-ah a pass a, Govt. High School Shillong-ah High School a lût zui a. Kum 1936-ah Matric First Division-ah a pass leh a. Cotton College, Gauhati-ah I.Sc (Intermidiate of Science) a zir zui a, I. Sc First Division-ah a pass hnuah  B. Sc. Chemistry Honours, Cotton College, Gauhati aṭang vêk chuan First Class-ah kum 1940 khân a pass leh a. Mizo zînga B.Sc pass hmasa ber a ni. Kum hnih zên zâwn zirtirtu hna a thawh hnuah kum 1943 aṭangin Serampore College-ah B.D. a zir leh a. Kum 1945-ah B.D. (Bachelor of Divintiy) First Class-ah a rawn pass chhuak leh ta a. B.D. a pass kum hian Serqampore Senate hnuaia B.D pass zawng zawng zingah a ti ṭha ber nghe nghe. A Graduation Certificate-ah pawh “The Candidate satisfies the examiners in Hebrew” tih an ziak tel kher a ni.

B.D. a zir zawh veleh hian Synod (Chutih lai chuan North Lushai Assembly tih a la ni) hnuaiah a thawk nghâl a. Kum 1945 September 23-ah Special Assembly Inkhawmpuiah Pastor atân nemngheh a ni zui ta nghâl bawk a ni. Ani hma hian Zoramthanga, Mizo zinga L.Th. pass hmasa ber, Pastor Hranga fapa chu Shillongah Assam Regiment-a Mizo awmte enkawl turin kum 1942 July 26-ah Secial Assambly-ah Ordainded a lo ni tawh a. Pastor Zoramthanga chuan kum chanve emaw chauh Pastor hna a thawk hman tihah hrisel lohna hrang hrang avângin February 24-28, 1943-a Assembly Inkhâwmpui chuan pawi ti tak chungin a chawlh an remtihsak a. Rev. Zairema B.Sc., B.D. ordained  a lo nih leh tâkah chuan Sipai Pastor atân thawn rilrûk a ni a. Mahse Indopui te a lo tâwp ta chhap nen. A hun chanve Kohhran hnaah a chanve dang Mizo High School Aizawl Assistant Headmaster hna chelh turin kohhran chuan a thawhtir ta a ni. Kum 1950-a Mizo High School Sorkarin a lâk thlengin a thawk.

Thil mak ve mai mai chu Rev. Zairema leh Pastor Vanchhunga khan inzawmna pawimawh tak an nei: kum 1917 September ni 2-ah Champhai Biakinah Pastor Vanchhungan baptisma a chantir a.  (A baptisma Registration No. chu 680 a ni.) Pastor atâna nemngheh a nih ni 1945 September 23-ah Moderator chuan nemngheh thar Rev. Zairema tâna ṭawngṭaisakna hun hmang turin Pastor Vanchhunga a sawm a. Kum 1947 March ni 4-a Dawrpui Biak Ina Pu Chawng (Compounder) fanu Nl. Thangdailovi, kum 18 nen an inneih niin inneihtirtu Pastor Thangan tuak tharte ṭawngṭaisak turin Pastor Vanchhunga bawk a sawm leh a ni!!

A fate : Lalbiaktluanga (L), Lalhmingthanga, Lalzoliani, Lalthawmmawia (L), Lalrinmawii, Dr. Lalzawmi leh Lalthanpuii te an ni a. Tin, A nupui  Thangdailovi hian kum 2003 March 6 khân a boral a.

Kum 1945 September maia ordained  ni mahse 1946 Ferbruary thlaa Assembly Inkhâwmpuiah chuan Secretary Senior atân Rev. Zairema chu ruat nghâl a ni a. A kum leh 1947-ah pawh chu ti bawk. Kum 1948 aṭangin kum nga chhûng Assembly Inkhâwmpui Junior Secretary emaw Senior emaw hna a chelh zawm zat a ni. Kum 1953 kumah Moderator a ni. He mi kum hian Assembly tih leh Synod tih hming inthlâk kum a ni nghe nghe. Mizo zingah chuan Rev. Zairema hi Synod Moderator naupang ber a ni. Moderator hmasa hnên aṭanga charg an inhlan hian kum 35 leh thla 11 chauha upa a la ni. Kum 1975 khân a ṭumhnihn atan Senior Executive Secretary a nih laiin Synod Moderator a ni leh bawk.

Kum 1945 aṭanga 1959 thleng Aizawlah a awma kum 1959 - 1968 chhûng Silcharah. Kum 1967 Synod Inkhâwmpui chuan Synod Office pui hmun nghâktu atân Full Time Secretary neih a rêl thlu a, a hmingah General Secretary vuah a ni ta. Chu hna chelh tur chuan thlan a ni nghâl a. Kum 1969 aṭangin kum 5 chhûng bawk 1974 - 1979 June thla thleng Senior Executive Secretary hna a chelh zui leh a. Kum sawm zet Banglapui-ah a chêng ta a ni.

Kum 1978-ah a pension a hun a, kum khat atân zêl a service pawt seiin kum 1982 thleng Bible Translation lam buaipui tu atân rawih zui a ni a. Kum 1983 aṭangin Synod service aṭang chuan a pension ta a. A pension hnu hian Bible lehlin lam hnaah chuan a la inhmgang zui zêl a. Kum 1986-a Mizo ṭawnga Thuthlung Thar, Common Language Version (Hmangaihna Aw) lo chhuak ta te, kum 1989-a Apokrifa Bu Mizo ṭawnga lehlin Phek 323 laia chhah te kum 1995-a Mizo ṭawnga Holy Bible  bu pum lehlin thar leh vek lo chhuak thei taah te khân a thawhhlawk ber te zinga mi a ni.

Politics lamah pawh a lo inhmang ve tawh ṭhin. Mizoram Political Party ding hmasa ber Mizo Union-ah 1946 November 9 aṭanga 1947 April 4 thleng Vice President a ni a. Kum 1957-a Lok Sabha M.P Inthlanpuiah Independent candidate-a din a dil a, Synod Standing Committee pawin November 29 1956 khân a phalsak a, amaherawhchu 1957 Inthlanpuiah chuan M.P. candidate-ah chuan a ding ta êm lo. Kum 1971 Inthlanpuiah erawh chuan Independent candidate a ni ta a, thla tlin erawh a ni pha lo deuh.

Kawng hrang hrang a rawngbawlna (services) te avâng hian kum 1988 February ni  7 khân Aizawla Serampore College Convocation nghah a nih ṭumin Senate of Serampore College chuan Doctor of Divinity (D.D) honoris causa Degree a hlan a ni. Tin, kum 1991 July ni 2 khân Shillong-ah Norht Eastern Hill University (NEHU) Shillong pawhin D.Litt. degree a hlân ve bawk. Kum 2001-ah Mizoram University a lo ding hrang leh ta a, he University thara kum 2005-a Mizo Department-a Professor tur leh Lecturers tur lak dawna Interview ṭumah pawh Rev. Dr. Zairema chiah hi Subject Expart atana hman chu a la ni ta zel hian a nep loh zia a ti lang chiang hle.

College a kal lai aṭangin article a ziak tawh ṭhin a, a article ziak hriat mai theih  hote chu hengte hi an ni :-

1. Thukhuh

2. Zûn

3. Tawrhna

4. Mai mai fakna

5. Mal

6. Sakhua leh Culture

7. A no ber mai no ber mai

8. Dul pen

9. Mizo ṭawng dik hman zir

10. Ziaka Mizo ṭawng

11. Mizo ṭawng kan hman dân ṭhenkhat

12. A eng zâwk nge upa?

13. Inthawina

14. Hmeichhia nge minu?

15. Mizoten hrisel an tum dân

Tin, heng lehkhabu te hi a ziak tawh bawk.

1. Bilat lei hman dân (1957)

2. Marka Hrilhfiahna (1971)

3. Johana Hrilhfiahna (1975)

4. God’s Miracle in Mizoram (1978)

5. Kan Bible hi (2003)

6. Pi pu te biak hi

 A lehkhabu te hi a ṭha hlawm ṭhe ṭhaw hle a, Puitling S.S. Zirlaibu-ah te leh Book of the year-ah te hial hman leh thlan a lo ni tawh a ni.

Kan Bible hi :- He lehkhabu hi MAL chuan Kum 40-na ‘Ruby Jubilee’ a lawmin April 23,2004 khan ‘Book of the Year 2003’-ah a puang a. A thu a ṭhat mai bakah a ziah dan a dikin chhiar a nuam a, Bible chhiar dan tur kimchang takin a inziak a, Mizo ṭawng thlûk dan tur phei chu chipchiar tak ziak a ni a, a chhiar sual theih loh ti ila kan uar lua lo tawp ang le. Ram hrang hranga Bible an thlir dan te a kim hle. Theology zir tum te tan phei chuan chhiar ngei ngei tlak a ni.

PI PU TE BIAK HI : Hei pawh hi a ṭha leh hle a, hun leh hmun neih a chipchiar taka sawi a châkawm hle. A kawm leh a paper a ṭha a, a ziak a dik in a mam hle a, uluk taka duan a ni tih a hriat hliah hliah a, a kut chhuak hnuhnung ber a ni awm e. Ṭawng hmanah a fimkhur hle a, Mizo ṭawng a thiam zia chiang takin a lang leh bawk. A thu a ṭha a, thu leh hla ngaina mi tan chuan chhiar loh phal chi a ni lo. Kum 2009 Book of the Year Top 2 a hauh nghe nghe.

Mizo Thu leh Hla a sulsutu te

 Biakliana

    August 26, 1918-ah a lo piang a. A pa chu Rev. Liangkhaia a ni a, a nu chu Ngurchhuani a ni. Kum 5 mi lek a nih hian a nuin a thihsan a; amaherawhchu a pa hian a nu nau Ngurliani chu nupui -ah a neih leh tâk avângin fahrah chan chang lovin enkawlna ṭha tak hnuaihah a seilian a. A naupan lai aṭnga uluk taka enkawl a nih hi a dam chhûng tawite-ah hian a nun a khalhngil ṭha hle a ni.
    Biakliana hi lehkha zir peih leh taima tak,  a thil tih lam chu mipuitling te anga tihtakzeta ti mi a ni a. Sikul kal hauh lovin 1928 khân Lower Primary a bei ve a, a tiṭha hle nghe nghe. 1931-ah Middle English a zo leh a, a kum lehah Silchar-ah High School kalin kum hnih emaw lek a awm hman a, Shillong lamah a insawn leh a, kum hnih vel bawk a awm leh hnuah Calcutta University lamah a kal ve leh ta thung a, 1936 khân Matric chu 1st Division-ah a pass a. Intermediate of Arts (I.A.) zirin Gauhati Cotton College-ah a lut a, 1st Year ṭha taka zovin a phûr chho hle a. Nimahsela, mihring te nunah hian vanneihna ringawt hian hmun a lo chang kum khua lo tawp mai. Misual berte pawh an thi a, an nâ a, chutiang bawkin miṭha berte pawh. Biakliana pawh a hun laia natna ṭihbaiawm tak T.B natna chuan a man ve ta! A hunlai chuan tihdam theih loh natna a la ni a. Natna ṭihbaiawm takin a man tâk avângin a zirlai chu chawlhsan loh theih a ni ta lo a. Hreh tak chungin a zirlai chu a chawlhsan ve ta a.

    Rilrunâ tak chungi Aizawl-ah a lo haw a, Durtlang Damdawi inah enkawl a ni a, in te an sak-sak a, tah chuanb Kaphleia nen an awm a. ṭhat lam a pan zêl avângin Saitualah awm dam turin hruai chhoh a ni a, hun engemaw chen a awm hnuah ṭhat lam a pan zêl avângin  kum 1941 khân a châk ber ṭhin, Pathian thu zir turin Cherra Theological College chu a pan leh ta a, Reipawh a awm hmain a natna ngai bawk chuan a tlâkbuak leh ta!! Robert Hospital, Shillong-ah October 19, 1941 khân Kum 23 mi lek niin mual a liam ve ta. A ruang hi Jaiaw thlanmual, Shillong-ah phûm a ni a.
    Biakliana hi zaidam ngungchang mawi tak, mi hneh thei tak a ni a. Mi te ngainat leh zah em em, an nel viau lawi si a ni.  Saituala a awm lai hian khawtlang tan hna pawimawh tak a thawk a, ṭhalaite hruai ṭha tur pawl Boy’s Scout, Rover Scout, Wolf Club, Blue Bird leh Girl’s Guide dinchhuaktu a ni. Ṭhalai Pawl tih a  ho a an din chu a hlawhtling hle a, YMA pawh hi Saitualah chuan 1980 hnu lamah a ding ve chauh a ni.
    Thawnthu sawi leh ziah thiam tak a ni a. Amah a inchhiar zau bawka a thu leh hla a ngaihnawm thei hle. A awm tawhnaah chuan a kil bial laih ṭhin a ni awm e. A sawi mai ni lo a ziah pawh a thiam zia a kut chhuak pahnih HAWILOPARI     leh LALI kan chhiar chuan a chiang hle.
    Kum 1936 khân Gauhati Cotton College-a I.A. a zir lai in Hawilopari tih thawnthu hi a ziak a, chu chu Mizo Novel kan neih hmasak ber a lo ni ta a ni. Chumi hnu kum 1937-ah LALI (Lalawmpuii) a ziak leh a, chu chu Mizo Novel pahnihna niin Short Story hmasaber a ni bawk.
    HAWILOPARI : A thawnthu hi a hiam lo hle a, Unau khawngaihthlâk, fahrah rethei tak nun, harsatna hrang hrangin a phuar vel, Vai lianin harsatna belhchhah a, chutih kara chhanchhuaktu lo lang ta chanchin a ni a, a ngaihnawm hle. A hun lai târ lan ni lo mahse vailen lai vela thil thleng angin a ziak a, Mizo History-a innghat thawnthu ṭhatak an ni. Historical Novel an tih ang hi a ni.
    LALI : Thawnthuah hian Biakliana chuan Mizo hmeichhe dinhmun tarlang pahin Kristian sakhaw zirtirna hrûla Love Story ngaihnawm tak a duang chhuak a. Pastor fap, Pathian Thu zir châk êm êm ina Kristian sakhaw hmehbela thawnthu a phuah hi a inhmeh hle a ni. LALI thawnthu hian kum 1939 - 1940 vela Mizo Zirlaipawl (MZP) in a buatsaih, “Mizo Hmeichhe Chan” tih intihsiakah lawmman pakhatna a dawng nghe nghe a ni.
    A thawnthu hmasa pahnihte hi a nêp lo hle a ni. A thawnthu ruangâm a ṭha a, mihring zia a târlang chiang hle. Ṭawngkam tluang tlam leh fiah fai tak, ngaihnawm hle si kum 60 emaw vel lai kal taa Mizo tlangval naupang tak, a thih pawha kum 23 emaw chauhin a  lo ziak thei hi fak tlâk a ni a, chawmawi a phû hliah hliah a ni.
    Thawnthu mai a ni nêm hla phuah, lehlinah pawh a duai lo hle, a hla phuahte hian sak a hlawh hle a ni.  In neihna hla kan sak lâr tak Kristian hlabu a pawh chuang phâk
    Chungkhuanulêng ruat sain
    Inneihna a lo awm...
tih hi Sankey hla thlûk hawhin a thu hi  phuah a ni.
    1. Lungngaih ni a awm ṭhin
    2. Chhandamtu’n kawng tluanin min hruai
    3. Zotui thiangte lung dem dem la.
Lehlin pawh a nei nual bawk.
    “Inte-thawveng”-a Kaphleia nen an awm lai hian CHHURA chanchinbu an chhuah \hin a; CHEMTATRAWTA CHANCHIN pawh a ziak bawk. A kutchhuak ṭhenkhat chu hmuh hleihtheih loh a ni ta, a pawi hle.

    A thlân lungah chuan ti hian a inziak
    L.BIAKLIANA
    College Student
    P. August 1918
    Th. October 1941

    Hei hi hriatrengna lo chang se,
    Lalpa rawngbawla hrân tum val \ha
    Chatuan chawlhnaah a kal ta e,
    Sakhming chul lo tur Lalbiakliana
        A pa Rev. Liangkhaia

A pa sawi ang ngei hian zofate zingah Thawnthu lama hma min sial saktu Biakliana hming hi a a dai tawh dawn lo a ni.

(College Student tih khi “Ziak mite chanchi” tih lehkhabu-ah chuan Sutdent tih a ni a chhutsual palh  nih ringin ka rawn correct nghal a ni e, ka tisual zâwk a nih chuan min hrethiam turin ka ngen a che u.)

Mizo Thu leh Hla a sulsutu te

A. Thanglura

    Pa pakhat nih tling Aloysiua Thanglura hi ni 3 December 1926 khân Sairangah a lo piang a. Aizawl Thakthing Venga a Pu Vanhlira hnenah lehkhazirin a awm a, 1936-ah Lower Primary a zo a, 1940-ah Middle a zo leh a. St. Anthony’s High School, Shillong-ah zir zawmin 1946-ah Matric a pass a. Shillonga Cotton College-ah a zir zawm zêl a. Kum laklawhah St. Anthony’s College, Shillong aṭangin B.A. a zo a. Law College lamah kal leh in Gauhati aṭangin B.L chu 1954 khân a pass leh bawk a, Mizo zinga a hmasa ber a ni nghe nghe.
    Mizoram politics-ah lutin, Mizo District Council inthlan hmasa ber 1952-a thlan tlin Pu R. Thanhlira chhuahsan hmun ruakah chuh ve a rilrûk a. Mahse mi thar a la nih avângin a rin aiin a lo harsa Councillor a ni chho ta zel a, Hêng hun lai aṭang hian a thawm a ṭha hle a, a mah pawhin, ‘Mizo Union Perhtê’ a inti ve ngat a ni. Kum 1954-a Pu R.B. Chawnga hmun ruakah thlan tlin a ni ve  ta.
    Mizo Union hotu lawk zingah a tel zel a, General Secretary te Vice President dinhmun te aluah a. Tin, kum 1954-ah Assam MLA atân thlan tlin a ni a, Assam Congress Party zawmin Shillong-ah a awm a, Parliamentary Secretary rei lo deuh a vawn hnuin, Chief Parliament Secretary-ah hlân kai a ni a. Tin, 1960 July thla khân All Party Hill Leaders Conference-ah Chairman a tân thlan a ni.
    Congress Party chu Mizoramah ni 10 August 1961 khâna din a. Kum 1962 khân Assam Congress MLA aṭangin MP (Rajya Sabha)-ah thlan tlin a ni a, 1967 thleng a vuan. Kum 1967-ah Assam MLA-ah thlan tlin a ni leh a, ni 6 November 1970 aṭangin Assam sawrkar Cabinet Minister a ni a, Mizo zinga hetiang hmun luah hmasa ber leh awm chhun a ni ta, January 1972 thleng a vuan a ni.
    Pu A. Thanglura hi mi thil hre zau tak, a ni a, tîm mang hauh loa thil sawi bawrh bawrh mai, mite inhmeh leh dik angreng tak, nuihzatthlâk tak sia fiamthua sawisak thiam êm êm, a hnuah mite pawhin an sawi chhawn fo ṭhin khawpa ṭawngkam bungrua nei ṭha em em a ni. Mite hriatreng tur ṭawngkau chheh fiamthu a ngah hle.
    A upat deuh hnu hian a bawrhsawm ve hle a, politics a chawlhsan hnuah lehkhabu a ziak a, chungte chu:
    1. Zoram Politic Lumlet Dân (Bel keh phuar khawm tui pai thei lo) tih chu 1983 khan phek 291 lai a chhah in a chhuah a ni a. He lehkhabu hi chhiar a nuam em em a, amah hrechiang deuh te phei chuan a ma bula a titi ngaithla ang deuhthawah min siam e an ti hial. Nuih pui kak kakna tur tam tak a awm. Mizoram Politics inher vel tarlanna a ni a. Ni a a hriat Mizoram politics virvel te, hruaitu hrang hrangte dinhmun leh nia a hriat dân tim mang lo a a sawina a ni. Chhiar a manhla hle. Pu B. Lalthangliana chuan “He lehkhabu kan chhiarin amah kâwm ang maiin a zia a nemkhai thiam êm êm hi a danglamna tak a ni awm e” a ti hial. Mizoram Politics zir duh chuan chhiar ngei ngei chi a ni.
    2. Mihrâng leh Sahrâng I & II . Hei pawh hi pui tak a ni. Phek 258 vel a ni a, sawi kawp nghal law law mai ila. He lehkhabuah hian thlûr bik a nei lo a, thil chi hrang hrang a khung khawm a ni ber mai. Tu emaw sawi dan takah a Hmâr bai a ni ber mai e. Mizo hnam chanchin, Krista Pasaltha te, Dullai sial leh Vankal sial te, Sangha Assembly te Sairang chanchin leh a tobul thlengin a bilh a. Tin dara thingpui huana Keimi te, India rama Sai hmingthang leh sa hlauhawm ṭhenkhat te,  Di-biahnemi te a ziak a. a khungkim hle a ni.
    A lehkhabu pakhat ang bawk khan chhiar a nuamin a nuihzatthlak angreng leh hle a. A ngaihnawm in a bengvar thlak khawp mai. Amah kawma, a bula awm ang mai a thu a kalpui leh thiam hi a namai loh zia a pholang chiang khawp mai.
    Mizo paah chuan pa chhuanawm leh thawm nâ, a tih lam chu nêk hraih chi, thil a sawi pawh a zai hraih khawpa ti na thiam, huhâng ngah tak a ni. Amah hi a indah sang in a inti sang ngai lo a, miten an dah sangin a thu an ngai chân zawkna hian miropui a nih zia a tarlang chiang hle awm e. He tiang khawpa mi ropui hi nimahse Thihna chuan a chungah ro a rel ve ta tho a ni Kum 1996 kha a MIZO THU LEH HLA lama sulsutu chu mual a liam ve ta a ni..Zofate he leilunga kan awm ve chhung chu a hming hi a dai tawh kher lovang.

Tun nge Nakin

Tarte leh Ṭhalaite thihna hian danglamna tak a nie tlat a sin, tarte chuan thihna an pan a, ṭhalaite chu thihna hian min pan a sin... Kum za damtura hnathawh a, naktuka thi tura ṭawngṭai leh nun hman uluk hi a lo va ngai tak êm.. I nunah khân Tun kha a pawimawh em em a, Tun kha I Siamtu Pathian tân i pe dawn nge, I nakin hun pêk i tum zawk? Nakin nei lo hian mual i liam mai lovang maw..

Pawisa Lem Hriat Theih Dân

Pawisa Lem Hriat theih dân

Sawmfâng hmun cham dêl

     Hun tam a liam ta, Pathianin Tui lêt tawh loh tur chhinchhiah nân a CHhimbâl a zâm tirna hun kha. Kha tih hunlai a a lâwmawm dân tur leh a mawi dân tur kha. A awmzia hria te tân phei kha chuan a hlu hliah hliah dawn a ni tiraw.. Ni e..kum sangtam a liam hnuah pawh chhimbal hi a lo la mawi reng mai chu a nih hi.
     CHu chhimbâl phena mawina zawng zawng nên a in lâr mêk he SAWMFÂNG  hi han thlir ve teh....He khawvela i la awm a, i la nung ve a, i rilte a la ṭam ve ṭhin a nih a he thil i hmuh a mawi i tih lo a nih chuan han insik chhin teh...?? Khuarel thil te hian mawina tam tak an lo keng a ni tih hi i haider lui a nih pawhin hai der kumkhua phal chi a ni dawn em ni? Hla phuah thiam Pu Rokunga'n Kan SAWMFÂNG hmun cham del, thinlai riang min hnem tu...a'n lo ti hnap mai te hi aw..khuarel thil in a nunah hmun thûk takin a chang a, Pathian thilsiam mawina chiang takin a hmu thei a ni tih a lang.. Pathian thilsiamte thi chhe tu leh hlut lo tu i la ni reng dawn em ni..Hêng khuarel thil te hian i pawi an sawi em ni? Siamtu chuan a en a ṭha a ti em em a tih a ni si a..a duh hliah2 te hi engtia rei nge kan hlamchhiah dawn? Thil siam zawng zawngte hian Pathian fate lo lan hun chu nghakhlel takin an thlir a sin. Nang leh kei kan harhchhuah a hêng khuarel thil te hi kan hlut a kan humhalh ava ṭul tawh tak êm...